Kocha wa zamani wa Yanga, Nasredine Nabi, amekiri kwa masikitiko makubwa jinsi timu yake ilivyopokea kipigo kikubwa katika mechi ya hivi karibuni, akisema “tulistahili.”
Kocha wa Kaizer Chiefs, Nasredine Nabi, aliiambia Mwanaspoti kuwa Yanga imefanya mabadiliko makubwa, na msimu ujao, timu yoyote inaweza kukutana na changamoto kubwa.
Yanga, ambayo tayari imerejea nchini na kombe lao la Toyota walilobeba Afrika Kusini baada ya kambi ya maandalizi, iliibuka na ushindi wa mabao 4-0 dhidi ya Kaizer Chiefs.
Nabi, ambaye alikuwa akicheza mechi yake ya kwanza kubwa ya kirafiki baada ya kutoka kambini Morocco, alisema Yanga imebadilika sana na kuwapa changamoto kubwa kwa haraka kupoteza mpira wakati wakiwa na umiliki. Wachezaji wengi vijana walishindwa kuhimili presha hiyo.
Aliongeza kuwa mbinu za Yanga zinaweza kuwa tatizo kwa timu yoyote ndani na nje ya Tanzania msimu ujao ikiwa haijajiandaa vizuri kukabiliana na aina hiyo ya shinikizo.
“Timu yetu ina wachezaji wadogo ambao hawakuwa tayari kukutana na ugumu wa aina ile. Ukiangalia, unaona namna Yanga ilivyoweka presha kubwa kwetu wakati haina mpira, na vijana wetu wakafanya makosa makubwa,” alisema Nabi, ambaye ni raia wa Tunisia.
“Kuna mabao ambayo yalionekana kama zawadi kwa Yanga, lakini tumejifunza. Kilichotokea kwetu kinaweza kuikuta timu yoyote ambayo haijaandaliwa vizuri kukutana na mbinu za aina hiyo,” alisisitiza kocha huyo.
Maoni ya Chivaviro
Mshambuliaji Ranga Chivaviro wa Kaizer Chiefs, ambaye aliwahi kuwaniwa na Yanga, alisema Yanga iliwaweka kwenye wakati mgumu kwa nidhamu yao wakati hawana mpira.
Chivaviro, mzaliwa wa Zimbabwe, alisema walikutana na changamoto kubwa katika mchezo wao wa kwanza wa kirafiki tangu kuanza maandalizi.
“Ilikuwa ngumu kwetu, ni kama hawakutupa nafasi ya kujipanga. Walilazimisha tuupoteze mpira haraka na kuchukua umiliki, nadhani hiyo ilikuwa silaha yao ya ushindi,” alisema mshambuliaji huyo wa zamani wa Marumo Gallants.
“Unajua huu ulikuwa mchezo wetu wa kwanza wa kirafiki na wenzetu walionekana kuwa wepesi zaidi kuliko sisi. Hii ilitufanya kuonekana hatukuwa tayari, lakini nadhani tutabadilika chini ya makocha wapya ambao wanaanza kutupa falsafa mpya.”
Mafanikio ya Yanga
Ziara ya Yanga ilikamilika kwa kuonyesha kiwango kizuri ambapo walicheza mechi tatu na kufunga mabao sita, huku wakipoteza mchezo mmoja pekee.
Yanga ilianza kwa kupoteza dhidi ya FC Augsburg ya Ujerumani kwa mabao 2-1, kisha ikashinda mechi mbili zilizofuata dhidi ya TS Galaxy na Kaizer Chiefs kwa mabao 4-0.
Yanga imerejea nchini leo na itaendelea na kambi fupi kuelekea kilele cha wiki ya Mwananchi, tamasha ambalo litakuwa na utambulisho wa wachezaji wao wapya.
Leave a Comment