Karihe aahidi mabao Mashujaa FC
Mshambuliaji mpya wa klabu ya Mashujaa FC, Seif Karihe, amefanya ahadi kuwa atajitahidi kwa nguvu zote kuhakikisha timu yake inapata mabao mengi katika Ligi Kuu Tanzania Bara na katika mashindano mengine ili iweze kufanya vizuri msimu ujao unaoanza hivi karibuni.
Karihe amesema kuwa anafurahia sana kujiunga na klabu hiyo yenye mashabiki wanaoipenda timu yao kwa dhati na kuipa klabu hiyo nafasi ya tatu kwa kuingiza watazamaji wengi msimu uliopita.
Katika mazungumzo yake akiwa kambini kwa maandalizi ya msimu ujao, Karihe, ambaye alijiunga na Mashujaa FC kutoka Mtibwa Sugar iliyoshuka daraja, alisema anaamini kuwa bado ana uwezo mkubwa wa kufunga mabao. Aliongeza kuwa amekutana na wachezaji bora katika kikosi hicho.
“Mimi ni mshambuliaji, na kazi yangu kuu ni kufunga mabao. Kila ninapokwenda, huwa naacha alama. Hata katika Mtibwa Sugar, ingawa timu hiyo ilishuka daraja, nilifunga mabao mengi. Nimejiunga hapa na kukuta hali ya kambi ni nzuri sana, ushirikiano na wachezaji wenzangu uko bora, hali hii imenifanya nijihisi nikiwa nyumbani kwa haraka. Ukweli ni kwamba hakuna ugeni katika soka; wachezaji wakikutana, hata kama hawajawahi kuonana, inachukua muda mfupi sana kuzoeana. Tunakuwa kama familia moja mara moja,” alisema Karihe, ambaye pia anachezea timu ya Zanzibar Heroes.
Karihe pia alieleza kuwa kitu kingine kitakachomsaidia kuwa na mzuka wa kufunga mabao ni aina ya mashabiki wa Mashujaa FC ambao wanaipenda timu yao kwa dhati na kuishangilia kwa mbwembwe kila inapocheza, hasa kwenye uwanja wao wa nyumbani wa Lake Tanganyika.
“Nimeona mashabiki wana mzuka mkubwa sana na timu yao. Wana moyo wa kweli kwa timu yao. Nilipoona Mashujaa ikishika nafasi ya tatu kwa kuingiza mashabiki wengi uwanjani nyuma ya Simba na Yanga, sikushangaa. Ni jambo zuri sana, na hili linatupa motisha hata sisi wachezaji kupambana zaidi,” alisema Karihe.
Karihe amewahi kuchezea klabu nyingine nyingi kama Mafunzo FC ya Zanzibar, Ruvu Shooting, Azam FC, Lipuli, Mbeya City, na Dodoma Jiji kabla ya kujiunga na Mtibwa Sugar.
