Yacouba Songne Ajiunga na Tabora United, Aahidi Makubwa
Mchezaji mahiri wa zamani wa Yanga na Ihefu, Yacouba Songne, amerudi tena Tanzania na kusaini mkataba wa mwaka mmoja na Tabora United ambayo inashiriki Ligi Kuu Bara kwa msimu wake wa pili. Yacouba, ambaye alikuwa mchezaji huru baada ya kumaliza mkataba wake na AS Arta/Solar7 ya Djibouti, alikosa muda na Ihefu lakini alifanikiwa kushinda ubingwa wa Ligi Kuu ya Djibouti akiwa na AS Arta/Solar7.
Habari za kuaminika kutoka kwa rafiki wa karibu wa Yacouba zinasema kwamba mchezaji huyo tayari amekamilisha mchakato wa kusaini na Tabora United na anatarajiwa kujiunga na timu hiyo hivi karibuni kwa ajili ya maandalizi ya msimu mpya wa 2024/25 unaoanza Agosti 16 baada ya kuzinduliwa na michuano ya Ngao ya Jamii kati ya Agosti 8-11 ikijumuisha Simba, Yanga, Azam na Coastal Union.
“Yacouba yupo Tanzania kwa takriban wiki sasa akiendelea na mazoezi. Ataitumikia Tabora United kwa msimu mmoja baada ya kusaini mkataba. Ubora na uzoefu wake katika ligi ndio sababu kubwa ya timu kumuamini,” kilisema chanzo hicho na kuongeza, “Mbali na Yacouba, Tabora pia imefanya usajili wa maana kwa ajili ya kuhakikisha timu hii haiwezi kurudia makosa ya kucheza mechi za play-off kama msimu uliopita. Wana kikosi kizuri na cha ushindi.”
Alipotafutwa Yacouba kwa mahojiano, alisema ni suala la muda tu kabla ya kujiunga na moja ya timu zinazoshiriki Ligi Kuu Bara, lakini alikataa kuweka wazi ni timu gani. “Mpira ni mchezo wa wazi, sio muhimu sana mimi kutaja timu niliyomalizana nayo. Muda ukifika kila mmoja atafahamu kwa sababu mpira unachezwa hadharani. Wataniona, lakini ni kweli nipo Tanzania na nitacheza Ligi Kuu,” alisema Yacouba.
Kwa mara ya kwanza Yacouba alicheza Ligi Kuu ya Bara alipokuwa akiitumikia Yanga mwaka 2020 baada ya kujiunga nao kutoka Asante Kotoko. Alidumu na Yanga kwa misimu miwili kabla ya kuhamia Ihefu kwa miezi sita. Akiwa na Yanga, alijipatia umaarufu kwa kuwa mfungaji bora wa klabu hiyo msimu wa 2020-2021 kwa kufunga mabao manane, lakini aliumia na kukaa nje ya uwanja kwa muda mrefu. Alipopona msimu wa 2022-2023, alijiunga na Ihefu na kufunga mabao matatu.
