Waziri Mkuu Majaliwa Aongoza Matembezi ya Hisani, Atoa Wito Kuhusu Upatikanaji wa Vitabu

Waziri Mkuu Kassim Majaliwa ameongoza matembezi ya hisani ikiwa ni sehemu ya uzinduzi wa maadhimisho ya miaka 50 ya Mamlaka ya Elimu Tanzania (TET). Katika hotuba yake, amesisitiza umuhimu wa kuongeza juhudi za kuhakikisha vitabu vinapatikana kwa wingi katika shule zote nchini.

Akizungumza katika hafla hiyo iliyofanyika leo (Ijumaa, Machi 7, 2025) katika ofisi za TET, Mikocheni jijini Dar es Salaam, Waziri Mkuu amepongeza juhudi za serikali chini ya uongozi wa Rais Dkt. Samia Suluhu Hassan kwa mageuzi makubwa katika sekta ya elimu. Amesema dhamira ya TET ya kuhakikisha uwiano wa kitabu kimoja kwa kila mwanafunzi ni hatua muhimu kwa maendeleo ya elimu nchini.

Aidha, ametoa wito kwa TET kushirikiana na kampuni binafsi na wadau wa uchapishaji ili kupunguza gharama za uchapishaji wa vitabu na kuongeza kasi ya upatikanaji wake. Kwa kufanya hivyo, changamoto ya upungufu wa vitabu shuleni itapungua, na wanafunzi wote watanufaika na elimu bora.

Kwa upande wake, Mkurugenzi Mkuu wa TET, Dkt. Aneth Komba, amesema kuwa maadhimisho haya yanatarajiwa kuhitimishwa mwezi Juni na yanalenga kukusanya shilingi bilioni 297 kwa ajili ya uchapishaji wa vitabu na ununuzi wa kompyuta za kuhifadhi nakala za vitabu vya shule.

Kauli mbiu ya maadhimisho hayo, “Kitabu Kimoja, Mwanafunzi Mmoja”, inabeba dhamira ya kitaifa ya kuboresha elimu na kusaidia maendeleo ya Taifa kwa ujumla.