Singida Black Stars VS Simba nusu fainali FA baada ya kuifunga Kagera Sugar; JKT Tanzania nao watakutana na mshindi wa Yanga vs Stand United.
Singida Black Stars Yaweka Historia, Yakutana na Simba Nusu Fainali FA
Timu ya Singida Black Stars imefanikiwa kufuzu hatua ya nusu fainali ya Kombe la Shirikisho la CRDB baada ya kuibuka na ushindi wa mabao 2-0 dhidi ya Kagera Sugar kwenye uwanja wa Liti, mkoani Singida. Ushindi huo umeifanya Singida kukutana na Simba SC katika hatua inayofuata ya michuano hiyo.
Katika mchezo huo wa robo fainali, Victorien Adebayor aliifungia Singida bao la kwanza dakika ya 11, kabla ya Jonathan Sowah kuongeza la pili dakika ya 66 na kuhitimisha ushindi muhimu kwa timu hiyo.
Kwa upande mwingine, Simba ilifuzu mapema baada ya kuishinda Mbeya City kwa mabao 3-1 kwenye dimba la KMC Complex jijini Dar es Salaam. Simba ilikuwa inamsubiri mshindi kati ya Singida Black Stars na Kagera Sugar, ambaye sasa amepatikana rasmi.
Katika robo fainali nyingine, JKT Tanzania iliibuka kidedea kwa kuifunga Pamba Jiji kwa mabao 3-1 kwenye uwanja wa Major General Isamuhyo. Mabao ya JKT yalifungwa na Mohamed Bakari aliyeonyesha ubora wake kwa kutupia kambani mara mbili—dakika ya 70 na 81—baada ya kupokea pasi murua kutoka kwa Karimu Mfaume. Bao la kwanza kwa JKT lilitokana na kujifunga kwa Justine Omary, beki wa Pamba Jiji, katika dakika ya 37.
Baada ya ushindi huo, JKT Tanzania wamesonga mbele hadi nusu fainali na sasa wanasubiri kuumana na mshindi wa mchezo kati ya Yanga SC na Stand United. Mchezo huo wa mwisho wa robo fainali utafanyika kesho, Aprili 15, 2025, katika uwanja wa KMC Complex ambapo Yanga itakuwa mwenyeji.
Michuano ya Kombe la FA inaendelea kupamba moto huku mashabiki wakisubiri kwa hamu mechi za nusu fainali zitakazohusisha timu kubwa na zenye historia ya ushindani mkali.
