Simba na Yanga waanza harakati za kumsajili Fei Toto huku Azam ikimwekea ofa ya zaidi ya Sh900 milioni, lakini kiungo huyo ang’ang’ania kwenda nje.
Fei Toto Aendelea Kuwachanganya Simba, Yanga na Azam kwa Mustakabali Wake
Kampeni ya usajili ya kiungo nyota wa Azam FC, Feisal Salum ‘Fei Toto’, imezidi kuchukua sura mpya huku vigogo wa Ligi Kuu Tanzania Bara, Simba na Yanga, wakipambana kumshawishi kwa ofa nono za kifedha. Licha ya klabu yake ya sasa kuandaa dau kubwa kumweka kambini, bado hali ya mambo inaonekana kuwa tata kutokana na msimamo wa mchezaji huyo mwenye ndoto ya kucheza soka la kimataifa.
Simba na Yanga Katika Vita ya Kumsajili Fei Toto
Fei Toto bado ana mkataba wa mwaka mmoja na miezi kadhaa na Azam, lakini tayari viongozi wa klabu hiyo ya Chamazi wameanza juhudi za kumshawishi kuongeza mkataba kwa kumuahidi ofa inayodaiwa kuwa ya juu kuliko yoyote inayotolewa na klabu nyingine ndani ya nchi. Hata hivyo, licha ya dau hilo kuvutia, kiungo huyo amegoma kusaini, akieleza bayana kuwa anatamani kupata fursa ya kucheza nje ya nchi ili kuongeza thamani yake kisoka.
Taarifa kutoka ndani ya klabu hiyo zinaeleza kuwa, pamoja na kutoridhia kuongeza mkataba, Fei Toto hana matatizo ya maslahi ya kifedha ndani ya Azam. Badala yake, anaamini kikosi cha sasa hakina ushindani wa kutosha kumpa nafasi ya kukua zaidi kama mchezaji. Ndiyo maana licha ya dau kubwa alilopewa, bado anatafuta changamoto mpya.
Soma: Singida Black Stars VS Simba Nusu Fainali ya Kombe la FA
Azam FC imeandaa ofa ya zaidi ya Shilingi milioni 900 kwa ajili ya kumbakisha Fei Toto, ikiwemo kumpatia gari jipya la kifahari, nyumba ya kisasa pamoja na kuboresha maslahi yake ya kila mwezi. Hii ni tofauti kabisa na gari la Toyota Harrier alilopewa awali aliposaini mkataba wa sasa. Klabu hiyo inaamini kuwa takwimu zake ndani ya kikosi zinadhihirisha umuhimu wake, kwani licha ya kushindwa kushinda kiatu cha dhahabu msimu uliopita, alimaliza kama mfungaji bora wa Azam FC kwa mabao 19, akizidiwa mabao mawili na Stephanie Aziz KI wa Yanga.
Msimu huu, Fei Toto ameendelea kuwa muhimu ndani ya kikosi kwa mchango wake wa mabao na pasi za mwisho. Kufikia sasa, amefunga mabao manne na kutoa pasi 13 za mabao, akiwa kinara wa asisti kwenye ligi, huku akiwa na mechi nne pekee zilizosalia kabla ya msimu kuhitimishwa. Takwimu hizi ndizo zinazowafanya Simba na Yanga kutamani kumsajili ili kuongeza ubora kwenye safu zao za kiungo.
Wakati vita ya saini yake ikizidi kupamba moto nchini, kuna taarifa kuwa klabu moja kutoka Afrika Kusini pia imeonesha nia ya kumsajili Fei Toto, jambo ambalo linaweza kubadilisha kabisa mwelekeo wa mustakabali wake wa soka.
Katika kipindi hiki cha mpito, macho na masikio ya mashabiki wa soka nchini yameelekezwa kwa kiungo huyu wa kipaji kikubwa, ambaye bado hajafikia uamuzi wa mwisho kuhusu hatma yake ya kisoka msimu ujao.
