Carlo Ancelotti Kuinoa Brazil 2025
Shirikisho la Soka la Brazil (CBF) limemthibitisha Carlo Ancelotti, kocha mwenye mafanikio makubwa barani Ulaya, kuwa kocha mpya wa timu ya taifa ya Brazil, hatua inayofungua ukurasa mpya wa kihistoria kwa nchi hiyo mashuhuri kwenye soka duniani.
Ancelotti, ambaye kwa sasa anaifundisha Real Madrid, ataanza rasmi majukumu yake ya kuinoa Brazil tarehe 26 Mei 2025, siku moja baada ya msimu wa Ligi Kuu ya Uhispania kufikia tamati. Uteuzi wake unaifanya Brazil kuwa na kocha wa kwanza wa kigeni baada ya karibu karne moja tangu mwaka 1925.
Kocha huyo mwenye umri wa miaka 65 anatarajiwa kuondoka Real Madrid mwishoni mwa msimu huu, ambapo nafasi yake itachukuliwa na Xabi Alonso. Katika msimu huu, Ancelotti amekumbwa na changamoto kadhaa, ikiwemo mfululizo wa vichapo dhidi ya Barcelona ya Hansi Flick, hali iliyotia doa mafanikio yake ya awali.
Ancelotti ana historia iliyosheheni mafanikio makubwa, akiwa ameshinda taji la UEFA Champions League mara saba—mara tano kama kocha na mara mbili akiwa mchezaji. Ametumikia vilabu vikubwa kama AC Milan, Chelsea, PSG, Bayern Munich, Juventus, Napoli, na Everton, na kutambuliwa kama mmoja wa makocha waliotukuka zaidi duniani.
Kupitia taarifa yao rasmi, CBF ilieleza kuwa uteuzi wa Ancelotti ni mwanzo wa enzi mpya iliyojaa matumaini kwa timu ya taifa ya Brazil, ikiwa ni maandalizi kuelekea kampeni ya kufuzu Kombe la Dunia la FIFA 2026.
“Carlo Ancelotti ni gwiji wa ukocha ambaye ameacha alama katika kila klabu aliyopitia. Tunaamini anaweza kurejesha hadhi ya Brazil na kutuongoza kwenye mafanikio makubwa tena,” ilisema CBF.
Brazil sasa inaelekea kwenye sura mpya ya kisoka, ikimpa Ancelotti jukumu kubwa la kuiongoza timu hiyo katika mashindano ya kimataifa, huku wapenzi wa soka wakisubiri kuona athari ya falsafa yake mpya kwenye kikosi cha Seleção.
